رصد نيوز الدولية رصد نيوز
مقالات مشابهة
يونس جلوب العراف
انظر الوجهي الصبح
وأسأل سؤالي الصعب
يرسمني يارسام ؟!
اشبه بقاية وطن
متفجر ابقنبلة
واطفاله كلها ايتام
وجهي دفاتر وهم
وحروفها من الدمع
ينكتها دهري نكت وتطيح منها اعوام
وبية التناقض طبع
شفاف مثل الندة
لكن ابنفس الوقت اعصابي حقل الغام
لتلومني من انشده
صح اني اشوف البشر
بس من مربع جام !
وخلصت حياتي حلم
محد رضة يفسرة
• من فسرو الاحلام
ناسيني حظي اببحر امواجه ما تنتهي
وعمري صحارة ندم وارمالها الايام
محتلني جيش القلق
وليلي قذايف ارق
اشلون العيون اتنام ؟؟
ابني مدن من امل
لكن بغفلة زمن
تهدمها ريح اوهام
والكلب لاجئ صفة
ومنراد لحظة فرح
حركو عليه لخيام !
خليها سكتة،، الحجي ما ينحجي بلسان
شحجي و انا الشاهدت الكمر بيد اقزام !
والمشكلة اتكاثرو والهم وجه صدام !
كلما كلت خلصو يطلع الف صدام !
وظليت بيهم اعد وانفاسي كلها انتهت بس منتهت الارقام!
ويبقة السؤال الصعب يرسمني يارسام ؟!
من يكدر امن البشر يجمع قصف وانغام ؟!
